GIRGENTI A LU 1876
Quannu cangia la spoglia lu sirpenti
teni la frodi e lu vilenu stissu
e lu lupu chi pilu cangia spissu
crisci intantu li vizi e l’ugna e denti.
Cussi fattu galanti ora Girgenti
villi, teatri, hotel, passeggi ha missu
ma di dazi e angarii criscìu l’abissu
e abissi di dulusi fallimenti.
Tutti li vizi e immensa ipocrisia
amicizia di labbra e cupa invidia
furti cu guanti e furba curtisia.
Senza dinari lussu, orgogliu e accidia
e si un tempu fu ditta Plebbi-ria
ora Girgenti è un saccu di Perfidia
di Giuseppe Serroy (1795-1881)
